حدوتتنا !

بيتنقلوا و يتنططوا ولا ابن بطوطة
حكاياتهم و زكرياتهم فقلوبهم محطوطة
و قلوبهم و قلوب ولادهم مع بعض مربوطة
اقولكم على اسرار صغنتوتة ؟؟
فى حاجة مهما اقولها على قلبى لا يمكن تصبح ملتوتة !
عارفين هى ايه ؟؟
دى حدوتة صالوننا احلى حدوتة !!!
حدوتة تبلغ من العمر 25
و 4 اطفال مهما كبروا برضو فعينيهم صغيرين
حدوتة يا رب تعيش تانى سنين و سنين
حدوتة ناس غلاوتهم عندى غلاوة عينيا الاتنين
ماهى حدوتى انا و هما
اهلى الطيبين !!

فى الذكرى الخامسة و العشرون لزواج بابا المهندس محمد النجدى على ماما المعلمة و الفنانة عزة حامد كتبتلهم هذا الشعر الركيك (كعادة اشعارى) احتفالا و ابتهاجا بامضائهم تلك المدة حسن سير و سلوك ، عقبال ما نحتفل بالذكرى 250
الغريب انى بقالى حوالى سنتين بفكر هنعمل ايه فى اليوم هنروح فين , و نفاجئهم ازاى
و لكن تشاء الاقدار ان يكونا معا بعيدا عنا (ربنا عتقهم من الخناقات اللى كانت هتحصل مننا) فى ارض اخرى غير الوطن , و اهو جو رومانتيكى خلاب برضو :))
فبما اننا مش هنعرف نفاجئهم فى ارض الواقع فقررت ان افاجئهم فى ارض الشبكة العنكبوتية .
الميزة اللى بحبها اوى فى بيتنا هو ان مفيش مختلف غيرى , محدش بيتخانق غيرى , و محدش بيعمل مفاجآت غيرى و اخيرا محدش بيعك فى المطبخ و يسيبه مقلوب غيرى (نحمد الله ان ماما مش هنا عشان تشوف منظره)

احب اوجه رسالة منى انا المدعو اكرم النجدى اخر العنقود الى بابا و ماما بكل سنة و انتوا طيبين ، من اكتر واحد بيضايقكوا و يعصبكوا و يقرفكوا و يطهكوا فى عيشتكوا فى الدنيا دى كلها :)))

ملحوظة : قلت الحق انشرها النهاردة بما ان الجو رايق , محدش عارف بكره هيحصل ايه :))