دولا مين ؟؟

دولا مين و دولا مين ؟؟ دولا شوية مصريين
دولا مين و دولا مين ؟؟ ممكن يكونوا قابضين
دولا مين و دولا مين ؟؟ دولا كمان معتصمين
دولا مين و دولا دولا مين ؟؟ قال ايه الكترة الساكتين
دولا ناس غريبة يا والدى معرفش عايزين ايه من بلدى !!
دولا ناس غريبة يا والدى معرفش عايزين ايه من بلدى !!
راضيين بالذل و بالظلم
و بيهينوا ولاد الأم
"هتخربوها و توقفوا العجلة يا شوية مندسين " !!
طب دولا فين و دولا فين ؟؟
دول فى روكسى قاعدين !
جنب السينما فى الجنينة و كام يافطة معلقين !! .
أما باقى الميادين
ففيها كرامة السنين
فيها ناس عشانك يا بلدى
لاجل يفتح وردك بدرى
فيها ناس عشان يا بلدى
لاجل يفتح وردك بلدى
عايزين كرامة و عايزين عيش
عايزين الشعب كله يعيش
سوا مع بعضه فى نعيم
دول ضد الظلم ظلم العسكر
و محاكمتهم للمدنيين !
دولا رسينا حماة الشهدا , دول التار لا يبات ولا يهدى
و الله ميدانك ما هينام ولا يهدا غير باعدام الظالمين
دولا مين و دولا دولا مين ؟؟ دولا شباب المصريين
دولا مين و دولا دولا مين ؟؟ دولا الناس الطيبين !

تغنين !!

اشتاق اليكى ؟
اجل !!
اشتاق لوجهك الباهر , لصوتك الساهر ... معى فى ليالى الشوق و فراق الاحبة .
تغنين للطيور فتطير قلوبنا معك فى السماء !!
تغنين للورد فيتحول الكون الى بستان
تبكين على حال البلابل فتدمع عينانا معك
تغنين لليالى الانس فتعود لنا الآمال يا آمال
تغنين للنائم فيحلم باجمل الاحلام ... و فجأة يستيقظ مهرولا
آملا برؤياك ... ولكن يتذكر فجأة انك لم تعودى هنا معنا
فقد رحلتى من عقود طويلة
لتتركى لنا الحزن و الحيرة
نحتار فى كيف رحلت و ما الاسباب
و لكن ننسى تساؤلاتنا و تتوه عندما نتوه و نغرق فى بحور اغانيكى !!

الوم تحل ذكرى رحيل الانسان أسمهان الأطرش !!
شكرا لنوران سراج على تذكيرى

اسيبكم مع دخلت مرة فى جنينة من اكتر اغانى اسمهان قربا لقلبى

أأبكى ؟؟

هل ابكى على ما فات ؟؟ ام على القادم ؟؟
هل ابكى على ما ضاع ؟ ام على الذى لن يأتى ؟
هل ابكى على الماضى الاليم ؟ ام على المستقبل المجهول ؟
هل ابكى على ما تغير بداخلى ؟
هل ابكى على عيوبى ؟؟
حتى التى لم اصنعها بنفسى ؟؟
أأبكى على احاسيسى ؟؟ الخاطئ منها و الصالح ؟
أأبكى على حالى ؟ على ما حل بى ؟؟
أأبكى على مفارقة احبابى ؟؟ المحب لى منهم و الكاره ؟
أأبكى على اعوام مضت دون جدوى ؟؟
أأبكى على المفقود من الاصحاب ؟؟ ام على المفارقون قريبا ؟؟
أأبكى على الغائبين الحاضرين ؟؟ ام على الحاضرين الغائبين ؟؟
أأبكى على من صاحبتهم فى حياتهم المريرة ؟؟ ام على من تمنيت مصاحبتهم و لم ينتظروا و اختاروا الرحيل ؟
أأبكى على ما حل بى ؟؟
أأبكى على كل ألم شعرت به ؟؟
أأبكى على كل شئ ؟ حتى تذبل عينى و يضيع شبابى و يأخد عمرى معه ؟
أم أبكى على الافراح القليلة التى حدثت ؟
أبكى على الواقع المرير ؟
ام على الاحلام المتكسرة على شاطئ الاحزان ؟
ترى ... هل يفيد البكاء ؟
ترى ... أأن بكيت سيبكى احد لحزنى ؟؟ أيربت على كتفى ؟؟ أيقول لى انا هنا ... هنا بجانبك ؟؟
ايقول لى الفرح آت ؟؟ أيحاول ان يحضره معه ؟ ربما فى ابتسامة على وجهه , او بمفاجأة تحت غطاءه ؟
أم ارحل مثلما أتيت لى هذه الدنيا ..... وحيدا ,,, عاريا ,,, باكيا !!!!

انه يا عزيزى )2(

معرفش ليه النهاردة حبيت النهاردة اكتب عن الامل
الامل اللى كلنا فى وقت فقدناه , الامل اللى فاتن حمامة فى مقابلتها اللى عملتها عيد ميلادها اللى فات قالت لو رجعت للفن هرجع بعمل عن
الامل اللى رجع لمعظمنا تانى , و اللى مرجعلوش نفسه يطلع غلطان و يلاقيه امبارح قبل النهاردة .
الامل اللى كلنا بنحارب بس عشان خايفين لحد يسرقه مننا .
الامل اللى كلنا بنعيش بيه و ليه , عشان يجيلنا و عشان نحميه !
الأمل بان فى حاجة حلوة فى بكرة مستخبية عشان تعملنا مفاجأة , عشان اما تطلع فجأة نفرح بيها اكتر
زى ما الليل بيبقى مستخبى وراه النهار . زى القمر بيبقى هلال و يكبر
زى ما احلامنا بتكبر معانا كل ما بنكبر
خلى املك دايما فى ربنا كبير , و اعرف ان فى ناس كتير قبلنا حققوا حاجات كانت المفروض مستحيلة
يبقى ليه احنا مش هنعرف ؟؟؟؟
يعنى داليدا بنت شبرا اللى كان عندها حول و هى صغيرة كان ممكن حد يقول انها ممكن توصل للى وصلتله ؟
طب بلاش كيت ميدلتون اللى جدتها كانت من عمال المناجم و مامتها مضيفة طيران كانت تحلم تتجوز امير , مش بس كده دى دخلت نفس الجامعة اللى دخلها !!
ممكن تكتئب لان الفترة اللى انت قاعد فيها مستنى تحقيق الامل طولت و ده طبيعى , لكن اوعى تفقد املك فان بكره احلى
انا معلش ممكن اكتئب لأن عندى ظروف خاصة لكن عمرى ما بفقد الامل فان مسير الايام الصعبة تفوت .
ملقتش اغنية معبرة عن الحياة قد اغنية فص زمرد لنهال نبيل , معلش هى صوتها فطسان شوية بس حلو :))



--------
حاجة اخيرة ::

لما الدنيا تكشرلك عارف تعمل ايه ؟؟؟ عوم و اتمخطر , عوم و اتمخطر مخطر مخطر , عووووووووم و اتمااااخطاااااار :)))

أخر كلام

أخر كلام ,
مش هكسل , مش هخاف , مش هأنتخ و مش هأنضم لحزب الكنبة السلبى اللاديمقراطى ,
مش هقعد فى بيتنا و اتحسب من الراغبين فى الاستقرار ,, ملعون ابو الاستقرار !!!!
مش هقعد لأنى مش هيجيلى حقى على الجاهز و انا قاعد ربنا قال :"و قل اعملوا فسيرى الله عملكم و رسوله و المؤمنون"
مش هقعد و آجى بعد شهرين تلاتة اندم انى منزلتش
مش هقعد و اعيش عمرى كله بالندم ..... و العار
العار انى بعد ما نزلت يوم 28 يناير و كان عيد ميلادى كسلت انزل يوم 8 .
العار لأنى طول عمرى بقول و ما نيل المطالب بالتمنى و لكن تؤخذ الدنيا غلابا و آجى اقعد فى البيت و اضيع حقى و حق الغلابة (بين غلابا و غلابة جناس ناقص :)) )
مش هخلى البنت اللى هتموت و تنزل و اهلها مانعينها تبقى اجدع منى
مش هضحى بفرحتى لما ببص فى عينى فى المراية الصبح و احس انى عملت حاجة فى سبيل التغيير و ربنا هيكرمنى و يغيرها
مش هضحى بفخرى و انا بقول لصحابى انا من الثوار :)
و مشهرضى ان المليونية تبقى ناقصة واحد عشان انا منزلتش
اللى عايز ينزل و يعتصم و يبات يا ريت
و اللى عايز ينزل يتظاهر شوية و يروح كويس
لكن اللى هينضم لحزب الكنبة و هو عارف اهمية نزوله يبقى ذنبه على جنبه
و اللى مش عارف اهمية نزوله يشوف الحاج ميل جيبسون هيقوله ايه :



مش ملاحظين حاجة ؟ اول حرف فى كلمتين اسم ميل جيبسون : م . ج ..... يمسيكى بالخير يا نوارة يا نجم ياللى كايداهم :)))
لو انت نازل و حد قالك النزول ده ملوش لازمة او هيضر متردش عليه , بس فرجه الفيديو ده :




يلا مع السلامة دلوقتى , و أشوفكم فى الميدان بكره ان شاء الله :)))

يا غالى ادى الرخيص ... بالجزمة !!!

انا بحب اوى افرح فى خلق الله , خصوصا اللامؤاخذة العرر :)))
الخبر من مصرواى

http://www.masrawy.com/News/Egypt/Politics/2011/july/4/ghaly_broken.aspx

بريطاني ''مصري'' يتعدى على غالي ويكسر نظارته

تعدى مواطن بريطاني من اصل مصري على وزير المالية السابق يوسف بطرس غالي، بالضرب أثناء تجول غالي وزوجته في حديقة ''هايد بارك'' بالعاصمة البريطانية لندن، خلال عطلة آخر الأسبوع، مما أدى لكسر نظارته وغصابة زوجته اللبنانية بالإغماء.

وذكرت جريدة ''روزا اليوسف'' يوم الاثنين أن غالي حرر محضراً في قسم شرطة ''متروبوليتان'' يتهم فيه مواطن انجليزي من اصل مصري يدعى جورج سعيد بالتعدي عليه بالضرب وكسر نظارته.

ووفقاً للجريدة، فغن سعيد برر اعتداءه علي غالي بأن الوزير السابق سرق مصر والمصريين''.

وقالت ''روزا اليوسف'' إن السلطات البريطانية طلبت من غالي مراجعة مكتب وزارة الداخلية هاتفياً عصر كل يوم لمعرفة تحركاته ونشاطه اليومي''، ملفتة أن ذلك يأتي في إطار التحقيق مع الوزير المصري السابق بتهمة التقدم بمعلومات كاذبة لوزير العدل.

وتمثلت المعلومات ''الكاذبة'' في تدوينه (غالي) في الأوراق الرسمية، أنه غير مطلوب لأي جهة من جهات التحقيق، علي خلاف الحقيقة، بعد أن تبين أنه هارب من تنفيذ حكم بالسجن أصدرته محكمة جنايات القاهرة، وفقاً للجريدة المصرية. وغالي من الموضوعين على قائمة المطلوبين من بالانتربول الدولي''.

طبعا قبل اما تفهمونى غلط و تبهدلونى بالكومنتات احب اقولكم ان الغالى اكيد هو اللى غله من واحد حرامى يخليه يكسر قانون فى دولة قوانينها صارمة و يديله فى وشه :)))

و الرخيص اكيد اللى الانتربول بيدور عليه , معرفش اومال المحضر ده ايه بالظبط !!!

تدوينة مهمة بس غريبة و عجيبة !!

ازيكم ؟؟
تدوينة النهاردة معمولة مخصوص عشان اعرف الى اين تذهبون , بس مش هذا المساء , عموما , محدش بيدخل يسلم عليا ليه ؟؟ :(((
انا زوعلان منكم خالص مالص و موتضايق !!
و بالنسبة للتويتر ينفع الغرب يبقى عاملينلى فولو و انتم يا قراء مدونتى الاعزاء محدش فيكوا بيعبرنى :)))
يلا فولو مى

و اشوفكم فى تدوينة بكرة اليومية

Published with Blogger-droid v1.7.2

قبل الاوان

قبل الأوان تدبل الورود ع الشجر
قبل الاوان تشعر البراءة بالخطر
قبل الاوان كبرنا .. كبرت ملامحنا
و بقينا قد غيرنا و تهنا فى المحنة
قبل الاوان كبرنا .. كبرت ملامحنا
لا عرفنا فين رايحين .... و لا حتى مين احنا
و ليه تبات سمانا مينورهاش قمر
و ليه تبات سمانا ميضمهاش حنان !!

حد فيكوا فاكر الاغنية دى ؟؟ دى اغنية فيلم اسرار البنات , الغريب انه حتى فى التتر مش جايبين سيرة الاغنية و لذلك كانت مجهولة المصدر تماما .
بس من اسبوع بتفرج على برنامج على روتانا مصرية و لقيتهم مستضيفين مطربة قالوا اسمها فيروز كراوية و اذ فجأة قالولها غنى قامت مغنية قبل الاوان , و قالوا اغنيتها دخلت و دعبست لحد ما جبت قرارها
فيروز كراوية خريحة طب بس درست فى معهد الموسيقى العربية و غنت اغنية قبل الاوان و هى فى الدراسة , لكن مقدرتش اوصل لسبب ان الاغنية مش مكتوبة فى التتر .
قبل ما اسيبكم مع الاغنية احب اقولكم ان البوم فيروز هينزل اخر السنة ان شاء الله