awram

المعهد القومى للأورام بفم الخليج يتلقى التبرعات على حساب 777 البنك الأهلى المصرى , أما مشروع إنشاء المعهد الجديد بمدينة 6 أكتوبر حساب 500 500 البنك الأهلى و بنك مصر . صفحة المعهد على الفيس بوك هنا

copyright

Protected by Copyscape Online Plagiarism Tool
ايها الطائرين و الله منورين يلا دوسوا اشتراك و خليكوا موجودين و ده حسابى فى تويتر خليكوا متابعين

الاثنين، 14 نوفمبر 2011

استفزنى شكرا !!


استكمالا لجزء بدأته العزيزة شرين سامى عن الحاجات المستفزة اللى بتقابلنا تلك الايام , قررت اكتبلكم انا كمان عن بعض المواقف المستفزة اللى قابلتها فى الفترة الاخيرة


انا مع الكسبان :

احدى الاقارب تقولى انا هنتخب عمرو موسى , ليه ؟ عشان كده كده البرادعى مش هيكسب و هى صوتت بلا و نعم كسبت فمش عايزة تفضل ع الخسران , عايزة مرة تنتخب حد و يمسك !!


يا جيل فاشل :

احد الاقارب فرق السن بينه و بين والدى كام سنة
انتوا جيل فاشل , ليه ؟؟ حد فيكم جه بعد الثورة و قال الحتة دى مليانة زبالة هنشيلها ؟ حد راح يعلم الناس ؟؟ حد قال يصلح حاجة ؟ البلاد المتقدمة اتقدمت بالجهود الذاتية مش بالحكومات !!

يا بتوع النص الكم :

احد المعارف يدرس الهندسة بيقول : هنتخب شفيق لو مش شفيق يبقى حازم ابو اسماعيل , ليه ؟ عشانه يطبق الدين , بس اكيد مش هنتخب البرادعى . ليه ؟؟ عشان انتوا ياللى عاوزين ترشحوا البرادعى عاوزين تجوزوا الشواذ !!


يا عم الحسيس :

فى حين ان البلد مش ناقصة بلاوى , و ان الناس معظمهم او بعضهم شايفين ان المظاهرات فساد و توقيف للعجلة الانتاجية اللى كواتشاتها مهوية , جه مجموعة من اللى احد المعارف مقتنع ان البرادعى هيجوزهم و عملوا قال ايه اليوم الوطنى لمثليى الجنس فى مصر و اعلنوا يوم للتجمع فى اوائل 2012 فى ميدان التحرير , طب مش كانوا يخلوها غمرة ؟ و مكافهمش , كمان عماليين بيسألوا اسئلة بتستفز الناس لدرجة ان بقى فى دعوات لنزول المظاهرة دى من المدنيين كأمن مركزى !!
على فكرة اللى فهمته من اللى قريته ان بتوع اليوم الوطنى دول بيطالبوا بالاعتراف بوجودهم و احترامهم و كده يعنى , يعنى مش بيطالبوا بحرية جنسية ، و انا الحقيقة اتفق معاهم جزئيا , يعنى انا شايف ان المثليين فى مصر فعلا مظلومين و لكن مش بالطريقة اللى الناس بيفكروا فيها , يعنى انا شايف ان المثلى المفروض اما يلاقى نفسه يقول لأسرته على الموضوع ده و المفروض اسرته تتقبله , بس مش تقبل بالمعنى ده , يعنى تتقبل ان ابنها يعانى من مرض نفسى ما , و حق المثلى الاول و ان لم يكن الوحيد هو حق العلاج ! ايون بما انهم بيقولوا انه مرض نفسى يبقى حقه انه يروح لطبيب نفسى يتعالج , ابسطهالك : لو ابنط عنده برد . انت هتتقبل انه مريض لكن مش هتتقبل المرض نفسه فهتعالجه منه . برضو نفس الكلام مع المثلى , انت هتتقبل انه مثلى بس مش هتتقبل المثلية نفسها فهتعالجه منها !
مشكلتى مع موضوع اليوم الوطنى ده حاجتين : اولا : احنا اتفقنا ان المثلية غلط و اننا مش عايزينها , و اتفقنا ان المفروض الواحد اما يصرح بالموضوع ده لحد يصرح بيه لاضيق دايرة ممكنة و ده عشان يقدموله الدعم لحد ما يتخلص منها , ما اتفقناش على انها تبقى ع الملأ و الناس كلها تعرف لأن ساعتها هتبقى ايه ده ؟ مثلية ! عادى يعنى . لأ المثلية مش عادى بس انت بنى آدم زى اى بنى آدم ممكن تتعرض فحياتك لحاجات متبقاش غلطتك بس تبقى لازم انت اللى تصلحها !
ثانيا سوء الاختيار , بمعنى يعنى انت شايف البلد مليانة اعتصامات و اضرابات مشروعة و دى الاغلبية و غير مشروعة و دى اقلية , و شايف الناس مش طايقة اى مظاهرة , اذا كانوا مش طايقين مليونيات التحرير اللى بتطالب بحقوق الشعب كله , هيرضوا بمظاهرتك انت فى حين ان هما اصلا مش متعاطفين معاك ولا ضد قضيتك بسبب تعليم فاشل و ثقافة منعدمة عن طريقة حل المشكلات !


يا ست الفنانة :

ظهر على تويتر من حوالى يومين هاشتاج عن علياء المهدى , اللى عملت مدونة عشان تحط فيها صور ليها هى و (حبيبها) و هما من غير هدوم , او يعنى لابسين بس من غير هدوم !
الغغريب فى الموضوع مش ان هى قاصر , ولا ان هى عايشة مع (حبيبها) ولا انه اتسجن قبل كده , ولا اى حاجة من دى , الغريب فى الربط بين علياء و بين الثورة , و الاغرب فى الناس اللى بتحاول تنفى الكلام ده بطريقة غريبة , يعنى اما لاقى مدونة مصرية من المدونات اللى تقريبا بندخل عليها و تقولك ان وردتلها خاطرة ان لما طلعت زكريا قال ان فى علاقات بتحصل فى ميدان التحرير كان فى , هو مشفهاش لكن كان فى , هو احنا ازاى بنحكم كان فى ولا مفيش ؟؟ يا جماعة اى حاجة متعلقة بالشرف و السمعة حتى لو كانت لشخص غير محدد لا يصح ابدا نقول فيها اى كلام من غير دليل الاثبات اللى ربنا قال عليه و هو ان يكون فى ناس ذات ثقة رأتهم رؤية العين , مش عشان صورة الثورة الطاهرة النقية و انا عشان اما نقول الكلام ده نبقى شبهنا الشباب و البنات اللى كانوا بيباتوا فى الميدان كل ليلة !!


يا سى البطل :

برضو من كام على تويتر حصل ان هيفا وهبى عملت اكونت , واحدة بتسأل مش متأكده ان دى هيفا فقالت الجملة الآتية : هى الوليا دى هيفا بجد ؟ قامت هيفا لجل حظها الهباب قرت التويتة و ردت عليها و قالتلها الولية دى اللى زيك و بلوك !
اولا البنت اللى سألت مكنتش تعرف ان دى هيفا ده اولا ثانيا دى كانت بتهزر , ثالثا لفظ ولية ده بقى عادى جدا اليومين دول و كلنا بنقوله , يعنى من الآخر البنت مشتمتش هيفا , و بالتالى هيفا مشتمتش البنت , و لكن تجد الناس اللى بتزيط فى الزيطة تقولها انتى شتمتى هيفا انتى بطلة , او هيفا شتمتك دى شرشوحة ....الخ ، الغريب ان البنت نصبت بطلة لحوالى ساعتين من الفاضى و مبقتش عارفة تقول لا أة انا شتمتها , ولا لأ هى اللى شتمتنى !


يا سى المدرس :

فى وسط هذه المعمعة طلعلنا من المقدر وسط كثيرون مدرس ازهرى و بما ان البنت ازهرية قالها كلام فيما معناه ان هو فخور بان بنت من عندهم ادت لل(عاهرة) هيفا على دماغها ! طب بذمتكم هو ينفع نطعن حد فى شرفه من غير اثبات ؟؟ و على فكرة مش هو لوحده كان فى كتير غيره و لكن ما يعاب عليه هو : اولا انه مدرس يعلم اجيال المفروض يعنى و المفروض يربيهم على ايه اللى يصح يتقال وايه اللى ميصحش ، ثانيا : انه ازهرى يعنى المفروض انه يبقى عارف دينه كويس و عارف انه كده يبقى بيقذف المحصنات , ثالثا : انه بيكابر لأنى بعد ما كلمته تطاول عليا . و اتحجج بان الكلمة مفيهاش مشكلة لأنها كلمة عربية فصحى . ما هو لو كانت الشتايم العامية بس اللى حرام مكنش ربنا حرم الشتايم ايام الرسول (ص) ايام ما كانوا بيتكلموا فصحى !! ما علينا بعد مناقشة طويلة عريضة رفعلى خلالها الضغط قررت ان انعم عليه بزرار البلوك اللى كان واحشنى باقله كتير !

يا أخ :

احد الاقارب من بعيد جدا و لكن تربطنا علاقة كويسة انفهش مرة اما لقانى مشترى كتاب مقتنيات وسط البلد , مش عشانى بقرأ و لكنه انفهش لما عرف انى اشتريت الكتاب يعنى الانفهاش كان فى انى دفعت فلوس الكتاب من دار كتب , و قعد يحكيلى انه اغلى كتاب جابه كان ب 3 جنيه و كان 500 ورقة طباعة فاخرة من سور الازبكية تقريبا و انه استخسر الفلوس اللى دفعها فيها بعدها , الغريب ان القريب ده من فترة ليست ببعيدة انضم لحزب العدالة و الحرية الاخوانى , و دفع 10 جنيه رسم الاشتراك , و بيتبرعلهم كل فترة بفلوس , و بيسافر عشان يحضر مؤتمراتهم عشان يسمع الدكتور معرفش مين و الشيخ معرفش ايه ! يعنى هى الفلوس فى الكتب بعزقة و سفه و فى اخوانك الاخوان عادى ؟؟ مصيبة ليكون فاكرها فى سبيل الله ! و الغريب اكتر انه نفس الشخص ده اللى كان قاعد على الكنبة مجعوص خلال ال18 يوم بيقولى بمنتهى الفشخرة على فكرة مش هتعرفوا تخلوا حسنى يتنحى !!!

هناك 9 تعليقات:

  1. و الله يا اكرم ليك تستفز
    بالنسبة لتويتر و الفيس بوك لا اطيق دخلوهم و لو دخلتهم ساعة يبقى كويس
    بالنسبة لعلياء الموضوع اخذ اكبر من حجمه فالتافهات مليين الدنيا نقف عندها ليه
    بالنسبة للمدرس اتأمرون الناس بالبر و تنسون انفسكم
    بالنسبة للحرية و العدالة
    دول يا صاحبى رضيو بسياسة القطيع يمين يمين شمال شمال و ياريت كانوا قاعدين على الكنبة بس ده شيخهم طلع فتاوى
    و سلملى على الانتخابات

    ردحذف
  2. أكرم آسفه إتأخرت عليك غصباً عني طبعاً :)

    بصراحه إنت غلبتني بجد إيه كمية الإستفزاز دي بالذات السياسي...ناس كتير للأسف موقفهم في ال18 يوم كان حاجه و دلوقتي العكس تماماً و مفيش أكتر من المنتفعين و اللي ماشين مع سياسة القطيع زي ما قال إبراهيم رزق.
    موضوع البنت بتاعة تويتر سمعت عنه بس مش فاهمه و مش عايزه لأنه واضح إنها عايزه تشتهر و في منها كتير رخاص جداً.
    هختلف معاك بس في حتة المثليين...لأنه غالباً مش زي أي مرض أو دور برد...ده شئ أخلاقي من الدرجه الأول...و يمكن اشد عذاب ربنا عذبه كان لقوم لوط لما خسف بيهم الأرض..منقدرش بعد كده نعترف بيهم و نحترمهم...ده حتى الرسول قالنا (إذا بليتم فإستتروا) يعني مش مفروض أصلاً إنهم يعلنوا عن نفسهم..ده تشجيع غير مباشر للرذيله و هيلاقي نفوس ضعيفه كتير ممكن يجربوا أو يتأثروا...و إحنا مش ناقصين بلاوي أكتر من اللي عندنا.
    موضوع هايفه ده بجد هايف جداً و الناس تحسها فاضيه كده مش عارفه ولية إيه هي دي شتيمه هي كلمة بايخه بس مش إهانه و بعدين ميصحش حد يهين حد و يفتكر نفسه بطل.

    بجد مبسوطه من البوست و عايزين أجزاء بقى أنا كمان يمكن قدام أكتب جزء تاني.

    تحياتي ليك :)

    شيرين سامي

    ردحذف
  3. استاذ ابراهيم : ميرسى لمرورك و تعليقك
    اتفق معاك فى موضوع علياء المهدى , اما بلنسبة لفيسبوك و تويتر بالنسبة لى فى الدم مهما قرفونى مقدرش ابعد
    بالنسبة للانتخابات : فى امل :))

    تحياتى و نورتنى

    ردحذف
  4. شيرين :
    على فكرة احنا متفقين فى موضوع المثليين بس انتى مش واخدة بالك
    المثلية فى الرأى اللى اتفق عليه معظم الاطباء النفسيين مرض نفسى , مرض
    انا مبقولش نقولهم و ماله و اتجوزوا انا بقول ان المفروض اللى يلاقى عنده الميول دى يقول مثلا لوالده و والدته و صديقه مثلا و هما واجبهم انهم يتقبلوه بمعنى انهم يقولوا و لا يهمك هتتعالج و يقفوا معاه فى رحلة علاجه , انا ضد ان يبقى فى وقفة لأن زى ما انتى قلتى هتبقى تشجيع مباشر و لو حصلت و اتكررت هنلاقى اجيال بالنسبة لها حكاية المثلية دى عادى خالص .
    اما قلت اننا نتقبلهم قصدت اننا نتقبل انهم يعانوا من خلل ما و نساعدهم على اصلاحه مش نتقبل صفة المثلية نفسها , انا بصراحة فكرت كتير قبل ما اتكلم فالموضوع ده , بس بعدين قلت انى المفروض اقول وجهة نظرى ربما تطلع صح :)

    بالنسبة لموضوع هيفا : بصراحة البنت صديقة عزيزة و الحق يقال هى مقالتش انها بطلة , الناس هما اللى قالولها و هى معرفتش تقولهم لأ ده محصلش ، برضو الواحد صعب يلاقى الناس بتنفخه و يقول لأ :))
    بالنسبة لموضوع علياء : الموضوع ببساطة زى ما كتبته عملت مدونة و حطت الصور و بس كده ! و مفتكرش بصراحة انها غاوية شهرة افتكر ان هى عملتها كحركة تحررية جنونية !

    بالنسبة للكنبة المستفزين مش كلهم منتفعين على فكرة بس امخاخ ضلمة بعيد عنك , حقيقى مشفتش سلبية كده فى حياتى !

    نورتينى و شرفتينى و آنستينى و يا ريت لو تعملى جزء تانى , حقيقى الواحد لو مشاكاش اللى فقلبه هيطق يفرقع

    ردحذف
  5. الانتخابات سواء الرئاسه او مجلس الشعب
    مقسمه الكل فى 100 اتجاه وماحدش عارف هيختار مين وليه

    علياء المهدى
    انا نفسى اعرف مالها دى !! فى لحظه بقت عامله قلق
    وبيتهيألى ده اللى هى عايزاه

    كلها حاجات مستفزه وخنقانا كلنا

    تحياتى ليك
    سعيد انى عرفت مدونتك

    ردحذف
  6. فعلا الاستفزاز بقى فى الجو وعندك حق على فكره كل حاجه بقت مستفزه جدا حتى الفيس وتويتر

    ردحذف
  7. صباح الورد kem

    أمور مستفزة ولكنها تحدث وبكثرة وخاصة في هذه الأيام ونحن نقف أمامها بهدوء غريب لأن السكوت فيها أفضل من الكلام فعندما نختار مرشح فقط لأننا نظن أنه هو الفائز فهذا قصور في فهم معنى الإنتخاب وعندما يطالب المثليين بحقوقهم فهذه مشكلة إجتماعية تحتاج لمعالجة وعندما نستغل تويتر أو أي شبكة إجتماعية لعمليات السب والقذف فنحن نجهل معنى التطور والتقدم عبر الشبكة العنكبوتية وعندما يقذف استاذ دين أزهري محصنة فهنا سنصرخ بعالي الصوت ما ما هكذا تعامل الرسول الأعظم حتى مع الزناة والعصاة ...

    للأسف الجروح مفتوحة ولكن يجب أن نضع أيادينا عليها حتى لا تزداد إتساع ..

    مقال جميل

    تحياتي وإحترامي

    ردحذف
  8. معرفش الحاجات المستفزة خاصه الظواهر زى علياء او الحاجات الاخري اللي اتكلمت عنها

    اشعر انها ظواهر علي قرب القيامه فعلآ

    او علي اننا نقترب من سقوطنا بالفعل

    محتاجين نبقي واحد فعلا اكتر محتاجين احنا كشعب نبقي مع بعض احسن واوعى من كدة

    عجبنى البوست دة اوى اوى بفكر انقله وانزله علي مدونتى للافاده اكثر دة بعد اذنك طبعآ ^_^

    تحياتى :):)

    ردحذف

عبرنى شكرا :)