استفزنى شكرا !!

استكمالا لجزء بدأته العزيزة شرين سامى عن الحاجات المستفزة اللى بتقابلنا تلك الايام , قررت اكتبلكم انا كمان عن بعض المواقف المستفزة اللى قابلتها فى الفترة الاخيرة


انا مع الكسبان :

احدى الاقارب تقولى انا هنتخب عمرو موسى , ليه ؟ عشان كده كده البرادعى مش هيكسب و هى صوتت بلا و نعم كسبت فمش عايزة تفضل ع الخسران , عايزة مرة تنتخب حد و يمسك !!


يا جيل فاشل :

احد الاقارب فرق السن بينه و بين والدى كام سنة
انتوا جيل فاشل , ليه ؟؟ حد فيكم جه بعد الثورة و قال الحتة دى مليانة زبالة هنشيلها ؟ حد راح يعلم الناس ؟؟ حد قال يصلح حاجة ؟ البلاد المتقدمة اتقدمت بالجهود الذاتية مش بالحكومات !!

يا بتوع النص الكم :

احد المعارف يدرس الهندسة بيقول : هنتخب شفيق لو مش شفيق يبقى حازم ابو اسماعيل , ليه ؟ عشانه يطبق الدين , بس اكيد مش هنتخب البرادعى . ليه ؟؟ عشان انتوا ياللى عاوزين ترشحوا البرادعى عاوزين تجوزوا الشواذ !!


يا عم الحسيس :

فى حين ان البلد مش ناقصة بلاوى , و ان الناس معظمهم او بعضهم شايفين ان المظاهرات فساد و توقيف للعجلة الانتاجية اللى كواتشاتها مهوية , جه مجموعة من اللى احد المعارف مقتنع ان البرادعى هيجوزهم و عملوا قال ايه اليوم الوطنى لمثليى الجنس فى مصر و اعلنوا يوم للتجمع فى اوائل 2012 فى ميدان التحرير , طب مش كانوا يخلوها غمرة ؟ و مكافهمش , كمان عماليين بيسألوا اسئلة بتستفز الناس لدرجة ان بقى فى دعوات لنزول المظاهرة دى من المدنيين كأمن مركزى !!
على فكرة اللى فهمته من اللى قريته ان بتوع اليوم الوطنى دول بيطالبوا بالاعتراف بوجودهم و احترامهم و كده يعنى , يعنى مش بيطالبوا بحرية جنسية ، و انا الحقيقة اتفق معاهم جزئيا , يعنى انا شايف ان المثليين فى مصر فعلا مظلومين و لكن مش بالطريقة اللى الناس بيفكروا فيها , يعنى انا شايف ان المثلى المفروض اما يلاقى نفسه يقول لأسرته على الموضوع ده و المفروض اسرته تتقبله , بس مش تقبل بالمعنى ده , يعنى تتقبل ان ابنها يعانى من مرض نفسى ما , و حق المثلى الاول و ان لم يكن الوحيد هو حق العلاج ! ايون بما انهم بيقولوا انه مرض نفسى يبقى حقه انه يروح لطبيب نفسى يتعالج , ابسطهالك : لو ابنط عنده برد . انت هتتقبل انه مريض لكن مش هتتقبل المرض نفسه فهتعالجه منه . برضو نفس الكلام مع المثلى , انت هتتقبل انه مثلى بس مش هتتقبل المثلية نفسها فهتعالجه منها !
مشكلتى مع موضوع اليوم الوطنى ده حاجتين : اولا : احنا اتفقنا ان المثلية غلط و اننا مش عايزينها , و اتفقنا ان المفروض الواحد اما يصرح بالموضوع ده لحد يصرح بيه لاضيق دايرة ممكنة و ده عشان يقدموله الدعم لحد ما يتخلص منها , ما اتفقناش على انها تبقى ع الملأ و الناس كلها تعرف لأن ساعتها هتبقى ايه ده ؟ مثلية ! عادى يعنى . لأ المثلية مش عادى بس انت بنى آدم زى اى بنى آدم ممكن تتعرض فحياتك لحاجات متبقاش غلطتك بس تبقى لازم انت اللى تصلحها !
ثانيا سوء الاختيار , بمعنى يعنى انت شايف البلد مليانة اعتصامات و اضرابات مشروعة و دى الاغلبية و غير مشروعة و دى اقلية , و شايف الناس مش طايقة اى مظاهرة , اذا كانوا مش طايقين مليونيات التحرير اللى بتطالب بحقوق الشعب كله , هيرضوا بمظاهرتك انت فى حين ان هما اصلا مش متعاطفين معاك ولا ضد قضيتك بسبب تعليم فاشل و ثقافة منعدمة عن طريقة حل المشكلات !


يا ست الفنانة :

ظهر على تويتر من حوالى يومين هاشتاج عن علياء المهدى , اللى عملت مدونة عشان تحط فيها صور ليها هى و (حبيبها) و هما من غير هدوم , او يعنى لابسين بس من غير هدوم !
الغغريب فى الموضوع مش ان هى قاصر , ولا ان هى عايشة مع (حبيبها) ولا انه اتسجن قبل كده , ولا اى حاجة من دى , الغريب فى الربط بين علياء و بين الثورة , و الاغرب فى الناس اللى بتحاول تنفى الكلام ده بطريقة غريبة , يعنى اما لاقى مدونة مصرية من المدونات اللى تقريبا بندخل عليها و تقولك ان وردتلها خاطرة ان لما طلعت زكريا قال ان فى علاقات بتحصل فى ميدان التحرير كان فى , هو مشفهاش لكن كان فى , هو احنا ازاى بنحكم كان فى ولا مفيش ؟؟ يا جماعة اى حاجة متعلقة بالشرف و السمعة حتى لو كانت لشخص غير محدد لا يصح ابدا نقول فيها اى كلام من غير دليل الاثبات اللى ربنا قال عليه و هو ان يكون فى ناس ذات ثقة رأتهم رؤية العين , مش عشان صورة الثورة الطاهرة النقية و انا عشان اما نقول الكلام ده نبقى شبهنا الشباب و البنات اللى كانوا بيباتوا فى الميدان كل ليلة !!


يا سى البطل :

برضو من كام على تويتر حصل ان هيفا وهبى عملت اكونت , واحدة بتسأل مش متأكده ان دى هيفا فقالت الجملة الآتية : هى الوليا دى هيفا بجد ؟ قامت هيفا لجل حظها الهباب قرت التويتة و ردت عليها و قالتلها الولية دى اللى زيك و بلوك !
اولا البنت اللى سألت مكنتش تعرف ان دى هيفا ده اولا ثانيا دى كانت بتهزر , ثالثا لفظ ولية ده بقى عادى جدا اليومين دول و كلنا بنقوله , يعنى من الآخر البنت مشتمتش هيفا , و بالتالى هيفا مشتمتش البنت , و لكن تجد الناس اللى بتزيط فى الزيطة تقولها انتى شتمتى هيفا انتى بطلة , او هيفا شتمتك دى شرشوحة ....الخ ، الغريب ان البنت نصبت بطلة لحوالى ساعتين من الفاضى و مبقتش عارفة تقول لا أة انا شتمتها , ولا لأ هى اللى شتمتنى !


يا سى المدرس :

فى وسط هذه المعمعة طلعلنا من المقدر وسط كثيرون مدرس ازهرى و بما ان البنت ازهرية قالها كلام فيما معناه ان هو فخور بان بنت من عندهم ادت لل(عاهرة) هيفا على دماغها ! طب بذمتكم هو ينفع نطعن حد فى شرفه من غير اثبات ؟؟ و على فكرة مش هو لوحده كان فى كتير غيره و لكن ما يعاب عليه هو : اولا انه مدرس يعلم اجيال المفروض يعنى و المفروض يربيهم على ايه اللى يصح يتقال وايه اللى ميصحش ، ثانيا : انه ازهرى يعنى المفروض انه يبقى عارف دينه كويس و عارف انه كده يبقى بيقذف المحصنات , ثالثا : انه بيكابر لأنى بعد ما كلمته تطاول عليا . و اتحجج بان الكلمة مفيهاش مشكلة لأنها كلمة عربية فصحى . ما هو لو كانت الشتايم العامية بس اللى حرام مكنش ربنا حرم الشتايم ايام الرسول (ص) ايام ما كانوا بيتكلموا فصحى !! ما علينا بعد مناقشة طويلة عريضة رفعلى خلالها الضغط قررت ان انعم عليه بزرار البلوك اللى كان واحشنى باقله كتير !

يا أخ :

احد الاقارب من بعيد جدا و لكن تربطنا علاقة كويسة انفهش مرة اما لقانى مشترى كتاب مقتنيات وسط البلد , مش عشانى بقرأ و لكنه انفهش لما عرف انى اشتريت الكتاب يعنى الانفهاش كان فى انى دفعت فلوس الكتاب من دار كتب , و قعد يحكيلى انه اغلى كتاب جابه كان ب 3 جنيه و كان 500 ورقة طباعة فاخرة من سور الازبكية تقريبا و انه استخسر الفلوس اللى دفعها فيها بعدها , الغريب ان القريب ده من فترة ليست ببعيدة انضم لحزب العدالة و الحرية الاخوانى , و دفع 10 جنيه رسم الاشتراك , و بيتبرعلهم كل فترة بفلوس , و بيسافر عشان يحضر مؤتمراتهم عشان يسمع الدكتور معرفش مين و الشيخ معرفش ايه ! يعنى هى الفلوس فى الكتب بعزقة و سفه و فى اخوانك الاخوان عادى ؟؟ مصيبة ليكون فاكرها فى سبيل الله ! و الغريب اكتر انه نفس الشخص ده اللى كان قاعد على الكنبة مجعوص خلال ال18 يوم بيقولى بمنتهى الفشخرة على فكرة مش هتعرفوا تخلوا حسنى يتنحى !!!