انا هدون كل يوم

رغم انشغالاتى الفزيييييييييعة طبعا بالمزاكرة (معلش اعملوا نفسكم مصدقيين) , و المكالمات اللى بتجيلى من المعجبين (قال يعنى احمد عز) , و انشغالاتى بحياتى الخاصة (على اساس ان عندى صحاب كتير اخر حاجة) , قررت اشترك فى حملة التدوين اليومية لشهر 6
ربنا يقدرنى بس عشان ببداية شهر 6 تبدأ الامتحانات و بنهايته تنتهى , لكن هحاول ادون كل يوم ان شاء الله
تدوينات هذا الشهر اليومية سوف تندرج تحت تاج خاص للحملة :))))
ممكن تشتركوا فى الحملة من الايفينت على فيسبوك هنا
و النبى متنسوش تدعولى اعدى من تانية ثانوى من غير ما تقع منى ولا مادة :))

اليكى !!

لأجلك يا مدينة الصلاة أصلي
لأجلك يا بهية المساكن يا زهرة المدائن
يا قدس يا قدس يا مدينة الصلاة اصلي
عيوننا إليك ترحل كل يوم
تدور في أروقة المعابد
تعانق الكنائس القديمة
و تمسح الحزن عن المساجد

الى القدس .... سيأتى يوما نغنى فيه نسم علينا الهوى

طعم الايام , مر اوى !!

حالة غريبة اوى هتحصلك اما تخلص قراءة رواية طعم الايام , الرواية نازلة بقالها تلات سنين تقريبا , بس انا قرأتها من شهريت تقريبا بناءا على نصيحة من صديقة عزيزة قالتلى عليها ।
الرواية من غير ما احرقها بتتكلم عن طلبة فى كلية الاعلام فى التسعينيات او بمعنى اصح فى بداية تفشى الفساد فى كل حاجة قبل ما يبقى شئ طبيعى متعودين عليه , و اللى بيحصلهم لما بتتكسر كل امالهم فى كشف الفساد و تعمير البلد على صخرة الفساد ।
الرواية روعة بشكل مش طبيعى , البداية متبينش مسار القصة ابدا قصدى بالبداية اول صفحتين المقدمة .
احلى حاجة انك متحسش ان انت بتقرأ قصة واحد واحد من الشحصيات لان بتعرف ايه اللى حصل للشخص ده من الشخص ده و ده بيخليك تجمع الاحداث كلها بسهولة كمان فى حاجة انك كانك بتسمع كل شخص لوحده و هو بيحكى بتشوف ده و هو بيتكلم عن التانى و بيقول انه شاف حاجة متغيرة فى التانى و بعدين بتشوف التانى و هو بيقول سبب التغيير !
عموما الرواية روعة جدااااااا ولما بتبتدى تدخل فيها شوية بتلاقى نفسك مش عارف تبطل , بس كئيبة حبتين و كل اما تحس ان فى حاجة كويسة هتحصل تقلب فى اخرها كل اما يبقى عندك امل ان الشخص ده هيفلت تلاقى نهايته بقت اصعب من اللى قبله , الفكرة اللى حسيت ان الرواية مبنية عليها هى ان الجيل ده محكوم عليه بالموت او الاكتئاب او الفساد .
الحاجة الوحيدة بس اللى تتاخد ع الرواية هى التشبيهات الكتير المركبة انا كنت بفقد تركيزى فى النص منها
عجبنى اوى تعبير (ابناء المنتكسين) لانه يدل على كل شئ
اكتر جملتين علقوا معايا كانوا :
لا يجب ان تكون فلسطينيا حتى تموت ينبغى فقط ان تذكر اسمها .
و الفينال اما احلام اتكلمت فى التليفون و قالت فى ملايين فى مصر بيموتوا من فقدان الامل !

العدل اساس الملك

فى وجوههم تجد البؤس و الشقاء , تجد التعب و الارهاق .... تجد الجهل و لكنك لن تجد الغباء !!
فى عيونهم ... تجد الفرحة و الحزن العميق .... تجد بركان تحت الهموم غريق !!
تجد الالم و الامل ...... تجد احلام دفينة فى باطن العقل ::::::
بتحقيق العدل !!!!!!!

elle est toutes le femmes

زى النهاردة توأم شخصيتى مات قبل ما اجى الدنيا بسنين طويلة
اللى بعرفونى من فترة يعرفوا انى أؤمن ان ربنا بيخلق الناس ليهم تركيبة لشخصيتهم متشابهة مع ناس تانيين
انا و داليدا تنطبق علينا نظريتى العجيبة دى :)
فى ذكرى وفاتها اللى افتكرتها اهوه عشان متجيش فى تخاريفى و هى زعلانة احب اقولها موحشتنيش بسمع صوتك كل يوم اكتر من لما بسمع صوت اى حد !!
كتبت عن داليدا من اسبوعين تقريبا هنا . و من قرابة السنة بدأت سلسة عن سيرة حياتها و منزلش منها غير الجزء الاول هنا
داليدا هى يمكن المغنية الوحيدة اللى كانت بتغنى احزانها , افراحها و افكارها .... اسيبكم مع اغنية (mourir sur scene) او الموت على المسرح ... حلمها اللى متحققش !!!


العجيب ان معظم فيديوهات داليدا اللى على يوتيوب النهاردة بايظة معرفش ليه !!!!
بس دى واحدة من اكتر الاغانى اللى بحبها ليها :

بن لادن ماااااااااااات ..... يلاهوى ....... و ايه يعنى !!!

خبر على كل القنوات ابتداءا من الاخبارية و صولا لقنوات النصب و التهجيص و هو .....................
أمريكا قتلت بن لادن !!!!!!!!!!!!!!
كان فى كلام طالع من زمان ان بن لادن مات خصوصا انه عجوز و كان فى كلام ان بن لادن كان صديق بوش و كان فى كلام كتشير اخر حاجة
ممكن بس نحلل الاحتمالات :
لو كان مات من زمان و كان بوش عامله حجة آدى اوباما خلص ع الحجة , لان بوش كان متأثر اوى بالحلم الامريكى منزل و سيارة لكل امريكى من غير تعب حقيقى على حساب الدول الاخرى , لكن ممكن يكون اوباما معندوش اللسعة دى و حب يخلص على الحجة اللى كان عاملها بوش .
و لو كان بن لادن و بوش اصحاب و كانوا متفقين مع بعض انهم يعملوها حجة عشان امريكا تدخل هذه الدول , فبرضو امكانية ان اوباما حابب يخلص من الموضوع ده واردة و تنطبق , لان الحروب دى واقفة عليهم بخسارة و اوباما وعد شعبه انه هينسحب من افغانستان و العراق .
ولكن !!!!!!!!!! هو معقولة امريكا بجلالة قدرها هتخرج من بلدين ايد ورا و ايد قدام تدلدل اذيال الهزيمة لا خلصت ع القاعدة و لا عملت اى حاجة بعد السنين الطويلة العريضة دى كلها ؟؟؟؟؟؟؟؟؟
ممكن يكون اوباما دور على حاجة يخلص بيها من المصايب اللى وقعه فيها بوش بس من غير ما يطاطى راسه ولا راس بلده
فيقولوا انهم خلصوا على بن لادن اللى كانوا بيدوروا عليه بقاله عشرميت سنة و بكده مهمتهم مانتهتش برضو هما هيفضلوا يحاربا الارهاب بس من بعيد !!
فى احتمال تالت ان الكلام ده بس عشان يرفعوا الروح المعنوية او عشان يبينوا للعالم ان اللى بيعملوه له هدف و بيجيب نتيجة
انا عن نفسى شايف ان فى الحالتين الاولانيين احنا الكسبانين خلصتوا ع بن لادن مبروك يلا مع السلامة سكتكوا خضرا
اما الاحتمال الاخير فده بالظبط زى حكم المحكمة يبقى الوضع كما هو عليه !!
الكلام عن بن لادن فكرنى بتدوينة كنت كتبتها من كزا شهر فى ذكرى تفجير برجى التجارة العالميين ممكن تقروه هنا
على رأى مينا زكرى ::
خلاص زيَّطنا كفاية في موضوع مقتل الإرهابي الشهيد بن لادن؟ نرجع نركز بقى في الكلام المهم... فين كاميليا ؟؟؟؟؟؟؟؟؟؟؟