مصر .... بتنادى

مصر بتنادى
خدوا بايدى يا ولادى
حاربوا عشانى و وصلونى للبر الهادى
مهما كانت قوة الاعادى
مهما كتر الظلم و اتمدت الايادى
رح افضل مصر و راح يفضل النيل فى حضن الوادى
رح يفضل قلب كل واحد طاير فى السما و هو بيقول بلادى
عارفة انه من بطنى ياما جبت اشرار
بس عارفة انى ولاده و ياما فى ابطال و اخيار
بس انا مليش حق الاختيار
انت يا ابنى اللى فى ايدك تختار
ياما تدفن الشر فى الابيار و تفضى تبنى
يا اما تسيب مجدى ينهار
انا ممنعتش حد يبنى و طول عمرى بستنى النهار
خدوا بايدى يا ولادى
احلفو عهد لتعمرونى
و لا رح تهجرونى
و كل واحد مهما يغيب
يرجع و يقول....
مصر بلادى

من كلماتى المتواضعة , ابتديتها يوم 25 -1 و وقفت لحد اتمدت الايادى و معرفتش اكمل
الحقيقة انه عمرى ما كنت بحب اسيب مسودات متسيفة من غير ما تكمل لكن كنت بقف هنا و معرفش اكمل
نزلت مظاهرات فى الفترة اللى فاتت قد ما نزلت و شوفت قد ما شفت بس معرفتش اكملها
الا لنهارده فتحتها و لقيت نفسى بكتب لوحدى
تصدقوا ان ده فعلا الوقت اللى مصر بتنادى فيه على كل واحد فينا .
يلا نبنى يلا نذاكر يلا نشتغل و نعمر و نختار اللى يمثلنا بحق .
انا بحب مصر :)