انت يا جدع انت !!
ما الاتوبيس واسع جاى بتزنق ليه !! .... ازاى تحط ايدك فى جيبى كده !
انا حطيت ايدى فى جيبك عشان احميك يا بيه اصل انت مش عارف فى كام واحد متربصين بيك و انا كده حامى ضهرك
شيل ايدك دى بقولك !ايه ده انت هتحط ايدك التانية فى جيبى التانى ولا ايه !! .... لأ متقربش من محفظتى و شيل ايدك دى ! ..... هات المحفظة اللى انت خدتها و متقربش منها و شيل ايدك ! ..... يا عم انت متفتحش المحفظة و و هاتها و متقربش منها ! .... انت عاوز تسرقنى ولا ايه !! لأ متتفرجش على صورتى و متقعدش تقرا فى بطاقتى العائلية !!! و و متفتحش المحفظة و هاتها ! ..... متقربش من الفلوس و متتفرجش على صورتى و متقراش بطاقتى العائلية و و متفتحش المحفظة !
انت طلباتك كتير اوى كده ليه يا بيه !! انا هلاحق عليك منين ولا منين ، يكونوش قالولك ان انا الخدام بتاعك !
الله متقرصنيش و متقربش من الفلوس و متتفرجش على صورتى و متقراش بطاقتى ! انا هعيده كام مرة عشان تفهم ! ... طيب انا هضربك !
هاهاها كان غيرك اشطر كل الناس اللى واقفة حوالينا دى فاهمين ان انت اللى بتسرقنى !
انا اللى بسرقك ازاى اذا كنت انت اللى حطيت ايدك فى جيبى !
هو كده ملكش دعوة
يا جدعان الحقوا الراجل ده بيقرصنى و بيسرقنى و و بيتدخل فى خصوصياتى و بيقرا بطاقتى !
يا جدع انت حرام عليك !! ده جزاء الراجل انه تاعب نفسه و بيحميك !!
بيحمينى ايه يا بشر بقولكم قرصنى و سرق الفلوس و بيتفتش فى محفظتى !!
ده انت مفترى و نكار للجميل صحيح ! هو غلطان من الاول انه شال مسئولية انه يحمى واحد زيك !
ياعم انا مش عايزه يحمينى !! ........ الله ! انت قطعتلى البنطلون ليه !!
انا قطعته عشان مصلحتك !
مصلحتى انك تبوظلى هدومى اللى حيلتى !! يا عالم الحقونى الراجل ده بيدمرنى ! سرق فلوسى و اتدخل فى خصوصياتى و بوظلى هدومى !
انت بنى آدم مريض !! بقى تقطع بنطلونك مخصوص عشان تتبلى ع الراجل ، أكيد مش هامك تمنه ، تلاقى حد باعتك عشان تعمل الفصل ده و فاكرنا هنصدقك و نظلم الراجل الجدع ده !
انا اصلا شايفه و هو داخل الاتوبيس كان بنطلونه مقطوع ! مفترى بقى عاوز يقول ان الراجل قطعله البنطلون و سرق فلوسه عشان يجيب بنطلون جديد من على قفاه !
انا كان بنطلونى مقطوع ؟؟!! انا ؟!! و الله ابدا ده هو اللى قطعهولى !!
أشكركم يا جماعة ، انتم عالم شرفاء و مفخرة للأتوبيس و الله ، و انا متشكر على ثقتكم فيا !
ثقة ايه بس يا حرامى ، هات حاجتى اللى سرقتها منى و انا هتصرف فى البنطلون !! ...... الله انت بتقطع بنطلونك ليه !!
آة يا حقير ، شفتوا يا جماعة الحقير ده بعد ما حميته و عرضت نفسى للخطر و تعبت نفسى عشانه فالآخر قطعلى البنطلون !!
ده انت راجل تيت صحيح ، ناكر للجميل و مبتقدرش النعمة ، بقى الراجل العظيم جالك يحميك و يحافظلك على حاجتك عشان يسلمهالك فى نهاية الطريق سليمة تقوم تعمل فيه كده، اخص عليك !!
كدب!! و الله العظيم كدب !!! هو اللى خد حاجتى و بوظ هدومى و قطع بنطلونه عشان يضحك عليكم !! و بعدين ده ،، ده فتح محفظتى و اتدخل فى خصوصياتى و قرا بطاقتى العائلية
أخرس يا كلب ، و قولنا مين اللى بعتك عشان تضر الراجل الطيب ده حالا !! و ايه يعنى اما يتدخل فى خصوصياتك ،،،، عادى !
أشكركم يا جماعة على ثقتكم دى و وقفتكم جنبى ! انا بس اللى يحز فى نفسى ، انى مش معايا حق بنطلون جديد عشان الفلوس كلها صرفتها عليكم و على الوغد ده فى تأمينه و تأمينكم !
يا عينى ّ انت راجل و الله و لازم نساعدك !
تأمين ايه !! يا عالم فوقوا !!! ماحنا ماشيين فالاتوبيس من الصبح اهوه ازاى صرف فلوس علينا و فى ايه !!
اخرس انت يا كلب ! هاتوا يا جماعة محافظكم ادوها للراجل الامين ده ، خلوه ياخد اللى يجيبله بنطلون يليق بمقامه و يحافظ لنا على حاجتنا بقية الطريق !
بس احنا لسه مدفعناش الاجرة !
معلش هو هيدفعهلنا من اللى يبقى من الفلوس بعد ما يشوف البنطلون بكام !
يا عالم فوقوا ده بيضحك عليكم !!
خد المحافظ اهيه !
اشكركم على ثقتكم دى !
بس فى اخبار سيئة ، كله بسبب الوغد الحقير ده ، الفلوس اللى معايا دلوقتى 1632 و ربع ، و انا اشتريت البنطلون الجديد ب 19000 جنيه يعنى احنا مديونين بفلوس كتير اوى ، و لو ملحقناش و دفعنا الاجرة هننزل من الاتوبيس !
يا عالم افهموا !! بينصب عليكم !! هو فى بنطلون ب19000 جنيه !!! ده بيسرق فلوسكم زى ما سرق فلوسى !
اسكت خالص انت ، انت سبب المصايب دى كلها لو مكنتش قطعتله البنطلون !
الله ما قطعتله البنطلون !
كداب !!
طب جاب البنطلون الجديد امتى و ازاى اذا كان الاتوبيس موقفش ولا مرة !!
انت حرامى ، و جاى تطعن فسمعة الراجل الشريف عشان نصدقك و حد باعتك عشان سوء سمعته و مدينيك الف جنية !
الف جنيه ازاى بس !! اذا كان كل اللى لقاه فى محفظتى اما سرقها 125 جنيه و نص !
يا حرامى يا كلب بتقول على سيدك بيسرق !!
كتفوه و سكتوه بالعافية ! ........ اضربوه و الزقوا على بقه الشريط ! و انا هحاول اتصرف مع السواق و اخليه مينزلناش ! بس اتصرفولى فى فلوس ، هاتوا هدومكوا موبايلتكم ساعتكم ، ديونكم كتير اوى !
يا عالم حرام عليكم اللى بتعملوه فيها و فيكم ، دا حرامى !!! ........ آاااه ، مش هسكت ، آااااه ، متسكتونيش انا بقول الحقيقة !!! آاااااه !!!!
-----------------------------------
القصة مخلصتش ، يمكن الجزء المكتوب منها هو اللى خلص ،لأن الباقى لسه محصلش !
يمكن القصة مجهولة الاركان و الشخصيات دلوقتى ، بس فكروا معايا ثانية كده فى شوية احتمالات و انا متأكد انكم هتعرفوا هما مين الشخصيات !
الجيب مش شرط يكون جيب ، ممكن يكون سُلطة !
المحفظة مش شرط تكون محفظة ، ممكن تكون خزانة او ميزانية ! أو ممكن عقل بيتسيطر عليه !
الخصوصيات مش شرط تكون صور و بطاقة عائلية ، ممكن تكون امور شخصية ، معلومات بيجيبها جواسيس ماشيين وراك ، او ممكن تكون ......... عذرية بيتكشف عليها !!
البنطلون اللى اتقطع مش شرط يكون بنطلون ، ممكن يكون سياحة اتدمرت بسبب احداث شغب مدبرها الراجل اللى قطع البنطلون ، او ممكن تكون تجارة دمرها بغباوته او بشره ، او ممكن تكون شرف بنى آدم طعنه فيها عشان يكسب ثقة ناس مبتفكرش و مش عاوزة تفكر و بترضى انها تساق ! و ممكن يكون دستور !!
الشريط اللى بيتلزق على البوق مش بالضرورة يكون شريط ، ممكن يكون قضية متلفقة عشان اما صاحبها يبقى ورا القضبان محدش يسمعه ! أو ممكن يكون سمعة بنى آدم شريف و اتلوثت باشاعات عن امتلاكه عربيات و فلل و قصور و تآمره مع دول الخارج و انه سافر يتدرب !
عرفتوا مين الراجل اللى قطع البنطلون ؟؟ ومين اللى اتسرق ؟؟ و مين اللى ماشيين ورا الحرامى من غير ما يسمعوا ولا يفكروا لمجرد انه ضحك عليهم و قالهم ان هو يعنى الأمان ؟؟
لو عرفت ، ياريت تقولنا فى كومنت ، و ياريت كمان تقولى ، تفتكر فى الاخر هيعرفوا يحطوا الشريط و يسكتوا المظلوم ؟؟ و لو سكت هل هيسكت للأبد ؟؟ طب هما هيعرفوا الحقيقة ولا هيفضلوا فى الوهم ؟
