شم النسييييييييييم

هو ينفع يبقى فى شم نسيم من غير الدنيا ربيع ؟؟؟


قفلوا على كل المواضيع و اخرجوا اتفسحوا بس انا هقعد
فى بيتنا اسمع اغانى :)))

لقمة النائب العام

طبعا كلكم كنتوا فاكرين ان دى هتبقى تدوينة كنوع من الهزار و الفكاهة و المرح و لكن هذا ليس صحيح بتاااااااتاااااااااا :))
دى وصفة حلو اسمه لقمة النائب العام من اختراع العبد لله
طبعا اللى ميعرفنيش من قريب ميعرفش عشقى العجيب الغريب للطبخ و المطبخ و للافتكاسات المطبخية بدءا من ترتيب السفرة و انتهائا بالاصناف العجيبة , و الحقيقة انه كان حلمى فى يوم من الايام انى ابقى شيف قبل ما اكتشف ولعى بالكتابة
البداية كانت غريبة شويتين كنت بعمل فطائر بالزبدة بتتعمل فى الطاسة و بعدين فروللللللللت و بما انى مبحبش استنى العجينة اما ترتاح افتكرتك ان الجيش بيقولك اتصرف , و لما طلعت شبة لقمة القاضى (بس دى بتقرمش اوى غير التانية و احلى بكتير) و بما انى بقيت بحب النائب العام قررت ان اسميها لقمة النائب العام
هقولكم الوصفة ببساطة
شوية دقيق كتير و علهم حبة بيكنج باودر , و نحط عليهم زبده سايحة و ندعكهم بالشوكة مع بعض بعدين نحط ميه دافية و شوية لبن لحد ما تبقى عجينة
بعدين نبرهما زى ما بنعمل تعبان بالصلصال و نقطعهم حتت صغيرة هتبقى عاملة زى الدايرة و نقليها فى زيت عميق و بعدين نرشها سكر بودرة .. و بالهنا و الشفا :))

تداوينى الحلوة يا تداوينى :))))))

ما شاء الله ما شاء الله ما شاء الله
النهاردة بس اتنشرلى 3 تدوينات ع المصرى اليوم لكشة واحدة
ايوان لوكشة عملا بنظرية طاظة بطازة بعت امبارح اللوت كله و النهاردة اتنشر
اول تدوينة هى الدوامة اللى نشرتها هنا يوم 28 - فبراير اتنشرت هنا
تانى تدوينة هى انا و هى اللى نشرته هنا يوم 30 - مارس اتنشرت هنا
تالت تدوينة هى : انتقدنى شكرا اللى نشرتها هنا امبارح اتنشرت هنا

مطلوب بقى سكرتيرة حسنة المظهر متكونش شتغلت قبل كده عند حد من اللى مشرفين فى طرة عشان ترد على التليفونات و تحدد المواعيد اصل انا بقيت مشغول اوى جدا خالص :))))))))))))))))))

انتقدنى شكرا !!!!!!!

من يومين كان اخويا بيتفرج على التلفزيون بالليل و الصوت كان عالى شويتين جت والدتى و زعقت جامد و قلتله وطى اخواتك عاوزين يناموا و انا كعادتى مبسكتش قمت قايلها طيب ما هم مش هيعرفوا يناموا من صوت حضرتك
و حدثت الصاعقة ..... كنت عارف انى دخلت فى المحظور بس الكلام كان بيطلع لوحده و معرفتش اوقفه , زى ما معرفتش اوقف كلام والدتى و هى بتقولى انى اما بلفت نظرها لحاجة او انى لما اقولها انها غلطت فى حاجة تبقى دى اهانة كبرى فى حقها و بعد محاولات كثيرة بائت بالفشل باقناعها انى اما عترض و اقول رايى او انتقد حجة متبقاش قلة ادب . قلتلها انا اسف و دخلت نمت , و انا فى السرير قعدت افكر هو حنا هنفضل كده لحد امتى ؟؟!!
انت ازاى بتلومنى يا ولد ؟؟ انا امك .. ازاى بتلومنى يا افندى انا المدير بتاعك .. ازاى بتلومنى يا صعلوك ؟؟ انا الرئيس !!
يا جماعة
ده مسموش لوم .. دى مناقشة , ابداء رأى و حتى لو في انتقاد فده مش غلط
الانسان لازم يبقى جواه نقد ذاتى و لو مانتقدش نفسه لازم غيره ينتقدوه و لازم يتقبل ده لانه ده فى معظم الاوقات هيبقى عشان مصلحته عشان هو يبقى او عشان معاملته للناس تبقى احسن و ده هينعكس على صورته فى عيونهم
النقد هو اول خطوة فى التطوير , فى الاسلوب العلمى للتفكير كانوا بيقولولنا اول خطوة هو تحديد المشكلة و النقد يحدد مشكله او عيب قد تكون موجودة و قد تكون لا لكن لازم اما الواحد ينتقد نه يبص لنفسه و يبص حواليه و يشوف هو صح ولا لأ العيب ده موجود ولا لأ بدل ما كل واحد اول اما بيسمع انتقاد او اقتراح معاكس لاقتراحه بيتضايق و يتعصب و يبتدى ينتقد اللى قدامه من منطلق اللى بيته من قزاز
المفروض ان احنا عايزين مصر تتغير , بس مش هتتغير غير بينا فعشان نغيرها يبقى لازم نتغير
نقبل النقد و نسمعه منعتبروش قلة ادب الا لو كن فيه قلة ادب , لازم نسمع بعض و نطرح وجهات النظر لحد ما نلاقى حل وسط يرضى الكل و بجد يحقق تقدم
اسمع موظفينك شوف ايه اللى مضايقهم شوف خططهم لتطوير العمل و ناقشهم اكيد هتوصلوا لحاجة ممكن تتنفذ بسرعة بحيث انها تخلى عملكم اسهل ليكم و للعملاء
اجمع مدرسين المدرسة و شوف اقتراحتهم
اجتمعوا مع سكان العمارة و شوفوا تجملوها و تجملوا الحى ازاى
اجتمع مع ولادك و شوف ايه اللى بتعمله و بيضايقهم و ناقشهم فيه و حاول ترضيهم من غير ما تدلعهم او تجرأهم
خلونا نحذف شوية كلمات من قاموسنا :
حضرتك , سيادتك , تحت امرك .. لو مسمعتهاش مش معنى كده ان اللى قدامك بيقل ادبه و لا معناه انه بيقلل من قدرك بس بلاش نصر اننا نضيع وقتنا و جهدنا فى اننا نسمع كلام مش هيقدم ولا هيأخر و نتخانق عليه بالساعت لمجرد ان احنا مسمعناهوش
تفتكروا حد هينفذ الكلام ده ؟؟؟ الاجيال الجديدة بس اللى مقتنعة بان الحاجت دى عقد فارغة انما الجيل القديم .. صعبة اوى ان احنا نغير مفاهيمهم بعد العمر ده