awram

المعهد القومى للأورام بفم الخليج يتلقى التبرعات على حساب 777 البنك الأهلى المصرى , أما مشروع إنشاء المعهد الجديد بمدينة 6 أكتوبر حساب 500 500 البنك الأهلى و بنك مصر . صفحة المعهد على الفيس بوك هنا

copyright

Protected by Copyscape Online Plagiarism Tool
ايها الطائرين و الله منورين يلا دوسوا اشتراك و خليكوا موجودين و ده حسابى فى تويتر خليكوا متابعين

السبت، 30 أكتوبر 2010

سمن على حلاوة ... يا حلاوة !!!



احلى فى الشعب المصرى انه بيضحك على كل مصيبة سودة بتهل على نافوخه
و العلاقى بين الضحك و المصائب علاقة طردية يعنى كل اما بتزيد المصايب كل اما بتزيدد الهموم و كل اما العقل الساخر بيالف نكت كعامل مضاد يتغلب بيه على الهموم .
دة دليل على انه فى الوقت الحالى المصايب المهببة اللى بتتطاير حوالينا من كل حتة لها جوانب ايجابية و دة يمكن الدافع الاساسى اللى بيخلى الدولة تتاخر فى حلها عشان تنشط مخ الشعب و تخليه يعلع بابداعاته الفلكلورية الملونة .
يعنى شوفوا مثلا : المخدرات من كتر ما زادت اصبح عندنا رائعة شربت حجرين على الشيشة
مشكلة تأخر الزواج بقى عندنا اخيرا اتجوزت و ماعدش ناقصنى حاجة
مشكلة انتشار الجهل و الخرفات طلع دياب باعجوبته واعاو واعاو واعاو واعو واعو واعو
بس كل دول كووووووووووووووم
و المصايب اللى بياتلف عليها نكت كوم تانى خالص :
مشكلة ارتفاع اسعار الطماطم و اللى يمكن ميكونش للحكومة ذنب فيها خلت كل الدنيا تتملى نكت
حتى فى البرامج الطبخ التلفزيونية اللى يعمل تورتة و يقول دى مبتتكلفش كتير دى بتمن 2 كيلو قوووطة
و اللى يطلع يقول وجبتنا موفرة اغلى حاجة فيها شريحتين الطماطم
حتى الجواهرجية بقم بيحطوا فى الفتارين طماطم جنب الدهب
مش بقولكم شعب ابن نكتة .
مشكلة الطماطم بتفكرنى بحاجتين خصلوا زمان بيدلوا على ان الشعب عندنا اهم حاجة بطنه :

خلونا نرجع بالزمن ستين سبعين كدة ......ايام الحرب العالمية التانية :::

ايام الحرب العالمية التانية كان فى ازمات فى معظم الاغذية الاساسية و اللى مش اساسية جدى كان بيحكيلنا انهم كانوا بيستخدموا نوع من البون بون فى تحلية المشروبات لانه مكنش فى سكر
لكن كان كل هم الشعب منصب فى الاغدية اللى مش اساسية
حصلت ازمة كبيرة فى الحلاوة الطحينية فى مصر و بقى تمن الكيلو ايامها يجى 50 قرش بالنسبة للناس اللى كانت ماهيتم اياممها تيجى جنية كدة ولا حاجة بقى سعر الحلاوة يعتبر سعر جنونى جدا
اللى كان يسمع نص جنية تمن للكيلو كان يقول : "يا لهول هذه الصاعقة" الله يرحمك يا يوسف باشا
و طلع الشعب بنكته و سخرياته و سلطاته و بابا غنوجه
و طلعت الحكايات عن الشاب اللى لما جه يتقدم لعروسة اهلها طلبوا الشبكة حلاوة
و الراجل الباشا الكبارة اللى فلس و وهما بيبجردوا محتويات السراية بتاعته عشان المزاد لقوا اقراص الحلاوة الثمينة فى المطبخ لموها هى و عملولها مزاد لوحدها و سددت ديون الباشا و زيادة و عاش اخر منجهه من ريع الحلاوة .

تعالوا بقة نرجع بالزمن ييجى 300 سنة ايام الاحتلال الفرنسى :
ايام الاحتلال الفرنسى دخل الفرنساويين منطقة فى القاهرة دلوقتى لكن زمان كانت من الارياف نسيت اسمها و قعدوا فيها .
الشعب اتضايق جدااااااا و ثااااااااار ....... لكن تفتكروا ثار ليه ؟؟؟؟؟؟؟؟؟؟؟؟؟؟؟؟
ثار يا حضرات عشان .... عشان المنطقة دى فيها طريق السمن , ولان الفرنساويين كانوا بيحاصروا و بيقطعوا سكك التجارة
فكدة يبقى هيقطعوا الطريق اللى بتمشى فيه السمنة و كدة مش هيوصل للقاهروية السمنة و مش هيعرفوا ياكلوا مسبك .
اية رأيكم بقة ؟؟
بزمتكم لو الفرنساوين كانوا فضلوا مش كانوا نضوفها ؟؟؟




الجمعة، 29 أكتوبر 2010

حكاية صالون!!!


فى احد محلات الاثاث الكبرى فى مدينة دمياط وقف صاحب المحل ينظر الى ذلك الصالون الاخضر المذهب منتظرا ان ياتى المشترى ليستلم الصالون المتفق عليه و ليستكمل دفع ثمنه .
و قجاة ظهرت فتاة معها امها و اخيها و حيوه و جلسوا ,
اعطت الفتاة صاحب المحل باقى المبلغ المتنفق عليه ليحرر لها وصلا بالصالون :
الاسم : عزة حامد خليل
خالص مع الشكر

الف مبروك يا مودموزيل عزة
و حمل الصالون على االسيارة النقل لينتقل لاول مرة فى حياته . ليوضع فى شقة صغيرة فى مدينة نصر .
جلس الصالون وحده فى الشقة حتى اتت تلك الفتاة الرشيقة مع والدتها لتوضع بجانبها غرفة سفرة اخرى انيقة .
و لياتى بالتوالى غرفة للمعيشة و غرفة نوم رائعة .
و بعد عدة اسابيع و بعد اكتمال الشقة . فى شقة فى مصر الجديدة كانت تنطلق الزغاريد فقد كانت تلك الليلة هى ليلة كتب كتاب الانسة عزة حامد على المهندس محمد النجدى . و لتجد كل الجيران و الاصدقاء فى المنزل ليشاركوا العروسين ليلة كتب كتابهم
كانت العروس مرتدية فستان ابيض نهارى مع القليل من المكياج و الزينة اظهرت جمالها اكثر و اكثر .
و كان العريس يرتدى بدلة بيضاء هو ايضا لتكون سهرة للصباح مليئة بالضحك و الفرح و ليتم بعدها باسبوع حفل الزفاف فى احد االنوادى التابعة للجيش . و ليذهب الزوجان الجديدان الى شقتهما لاول مرة ليجد الصالون اخيرا من يجلس عليه . و لكن سرعان ما يترك الصالون وحده ليطير العروسان الى فندق سان استيفانو فى الاسكندرية لقضاء شهر العسل ...... او ل 5 ايام عسل .
فى اليوم الخامس اتصل حمى العروس بابنه ليخبره بوصول معلومات مؤكدة عن افلاس شركة الاموال الشهيرة النى تضع بها زوجة ابنه ميراثها و لينزل العروسان الى القاهرة ليسحبا المال خوفا عليه من الضياع مع ان العروس قد اعادت المال الى نفس الشركة بعدها بفترة قصيرة لتشهر الشركة افلاسها بعدها باسابيع .
فى الطريق من الاسكندرية جلست تفكر فى انها اصبحت زوجة و اصبح لديها عائلة و جلست تتذكر تفاصيل الزواج .
انه كان زواج صالونات بلا شك فقد كان محمد اخو صديق اخيها و كانت والدته كثيرا ما تتردد على منزلهم كما كانت والدتها تتردد على منزلها .
و فى يوم رات والدة محمد عزة و سالت ان كانت مخطوبة لتجد الاجابة بالنفى فتطلب من والدة عزة صورة لعزة تبعثها الى ابنها فى الامارات , و بالفعل احضرت قدرية هانم صورة لعزة فى عيد ميلادها وسط صديقاتها لتعطيها لكاريمان هانم لتاخد كاريمان هانم قلما و ترسم دائرة حول راس عزة و تكتب بجانبها العروسة .
فى الزيارة القادمة احضرت كاريمان صورة لابنها المقيم فى الامارات لتريها لقدرية هانم , و لكن بعد ذلك هدأت الاحوال و سكتت الاخبار .
لبعدها بفترة تتصل كاريمان هانم بمنزل قدرية هانم لتحدد موعد للزيارة الودية .
تين تين ....... فتح الباب لتدخل كاريمان هانم و معها ابنها و تراه عزة عن طريق المرأة و هو يدخل الصالون .
زيارة تلو زيارة . جاءت الزيارة الرسمية لطلب الزواج و ليكون الجواب بالموافقة . و ليجد عريس المستقبل طلبات العروس غاية فى الواقعية و الاتزان .
و بعد عدة اسابيع تمت الخطوبة فى احد قاعات النوادى التابعة للجيش فقد كان والد عزة الراحل فى الجيش سابقا قبل ان ينتقل للعمل فى راسة الجمهورية .
كانت عزة مثالا فى القناعة و الرضا و الاعتداد بالنفس و كان محمد مثالا للاخلاق و الادب و العطاء حتى فى اختيار الاثاث لم يختلفوا حتى و ان اختلفت اذواقهم , و قع الاختيار على الصالون الاخضر
و بعد اقل من سنة خطوبة تم الزواج و بعد سنة زواج تتابع الزوار فى الجلوس على الصالون الاخضر يوما بعد يوم مهنئين الزوجين بميلاد اول طفل احمد الشهير فى فترة الطفولة بالخواجة .
ولكن سرعان ما اصبح الصالون وحيدا مرة اخرى عندما قرر الزوجين السفر الى السعودية للعمل ليهجر الصالون ثمانى سنين لا يقطعهم الا الزيارات القصيرة بين الفينة و الاخرى . و ليرزق الزوجين فى سنين الغربة بثلاثة اطفال هو افنان و ايمن و اكرم على الترتيب .
و يعودا بعد ذلك و عمر اكرم لا يتعدى السنة و نصف .
عادا الى شقتهم الصغيرة التى رضيا الاثنان بها مكانا لبدأ حياتهم و لكن سرعان ما انتقلا الى مدينة العاشر من رمضان هربا من الزحام و من اخلاق العاصمة التى نادرا ما يمكن للاهل فى ظلها ان يتمكنا من تاسيس اولادهم بطريقة صحية
انتقلا من شقة مدينة نصر الصغيرة الى فيلا جميلة فى المدينة الجديدة و لينتقلوا من فيلا اخرى و ينتقل معهم الصالون الاخضر
لتواجههم مصاعب جديدة غير التى تغلبوا عليها . و ليتغلبوا عليها ايضا بحكمة الزوج و عمله و برضا الزوجة و حسن التدبير و التفكير . فلم تتخلى عن زوجها فى المحن و لم تجعى انها ليست مسؤولة عن الحل بل و كانت احيانا تبيع من مجوهراتها حلا للازمات . و لطالما حفظ لها زوجها ذلك و عاملها معاملة حسنة تليق بها و به .
اعتقد انكم عرفتم من هم الزوجين السعيدين :
انهم ابى و امى
الزوجين المتفاهمين العاقلين
نتاج التربية المثقفة المتأنية الصالحة لينتجوا ابناءا بنفس القيم و الاخلاق
الطالما لم اقتنع بزواج الصالونات القائم على معارف الاهل و لكنى دائما ما اقف عند ابى و امى مشدوها معجبا محترما .
فى رأيى انهم ليسوا حالة استثنائية عن زواج الصالونات و لكنهم حالة استثنائية عن التربية و العقل و الاخلاق و التحمل و الصبر و الرضا بما كتبه الله .
دائما ما كانت امى تجلعنى اصلى معها و دائما ما كان ابى يحاسبنى عما اذا كنت قد صليت ام لا .
لطالما كانت امى تعلمنا الدين و الفقه و لطالما كان ابى هو مثال الدين و الشرف فهو الرجل الذى رفض رغم كل الاغراءات ان تمتد يده على قرشا من حرام و كم كانت القروش الحرام من حوله كثيرة و كم كانت الملايين .
و امى كانت ذات اخلاق لا تغش و لا تكذب ولا تخدع مع ان ذلك كان قد يفيدها كثيرا .
لم اجد يوما ابى و امى يتشاجران امامنا و مع كل الضغوطات حولهما كانا اذا اخطأ احدهم يمتصه الاخر ليعاتبه بعد ذلك بينه و بينه .
سافر ابى منذ سنتان الى السعودية ليترك لامى حمل تربيتنا و الاشراف عليها لتقف صامدة تفعل ما عليها و اكثر و تحاول بكل جهدها ان تسعد الجميع .
انهما زوجان حددا هدفهما منذ لحظة زواجهما انشاء اسرة متزنة عاقلة و تامين مستقبل اولادهم و لطالما كلفهم تامين مستقبلنا جهد و تعب و حرمان من كثير من الاشياء التى يريدونها .

منذ ان تزوج ابى و امى فى 29-10-1986 حتى اليوم 29-10-2010 و هما يكرسان حياتهما لنا و لاسعادنا ولاسعاد الاخر .
اليوم تحل الذكرى الرابعة و العشرون على زفاف ابى و امى ولكن فى قلبيهما مازلا عروسين
مازالا يحتفظان بحبهما و احترامهما و تافهمهما و حياتهم الزوجية , و مازلا يحتفظان ايضا............ بالصالون الاخضر

كل سنة و انا عندى احلى اب و ام فى الدنيا

الأربعاء، 6 أكتوبر 2010

المصريين اهمه (مش اللى فى دماغكم)




اما كتبت يوم 30 سبتمبر عن فرقة المصريين هنا نسيت اقولكم انى كتبت بمناسبة مرور عام على اعادة انشاء الفرقة و اول حفلة عملوها بعد العودة يوم 1 - 10
ايووووووون !!!!!!!!
المصريين رجعوا من سنة و اتجمع شملهم و بيعملوا حفلات فى ساقية الصاوى و بيطلعوا فى برامج كتير دلوقتى

متنسوش الحفلة الجاية يوم 28 اكتوبر الساعة 8 فى ساقية الصاوى فى الزمالك
و فى الحفلة مفاجاة حلوة اوى ............... اقولكم ؟؟؟؟؟؟
هقولكم :
حفيد الرائع صلاح جاهين احمد حداد هيحضر الحفلة و هيلقي اغنية الشوارع حواديت و ايمان يونس بتغنيها

بوستر الحفلة اهوة :



هشوفكوا هناك ؟؟

6 اكتوبر فى المدرسة!!!!!


من اول ما عملت المدونة و انا مستنى 6 اكتوبر عشان اكتب فى ذكراه
لكن قررت انى مش هكتب الكلام التقليدى اللى الكل زمانه كتبه دلوقتى
مديرة المدرسة بتاعتنا ست محترمة جدا و مصرة على تنمية الروح الوطنية عند كل طالب
عملتلنا حفلة امبارح بمناسبة 6 اكتوبر و كانت من تقديم الطلبة .
اللمهم فى الحفلة و خطف انتباهى كلام مدرسة التاريخ فى الحفلة
حبيت اكتبلكم الكلام اللى قالتهولنا :
حرب اكتوبر مش مجرد حرب بين دولتين
دى حرب ما بين جبهتين كل جبهة لها اتجاهاتها و لغتها و دينها و قيمها و اهدافها
المصريين بعد النكسة عرفوا كدة كويس و اما ابتدوا يستعدوا لتحرير ارضهم كانوا حاطيين ده فى الحسبان
درسوا عدوهم الاول و شافوا ازاى يقدروا يدخلوا من الثغرات اللى فى نظامه الدفاعى
اول حاجة يوم 6 اكتوبر كان موافق العاشر من رمضان و محدش كان يتوقع ان ممكن الحرب تبقى فى رمضان
و كمان كان يوم عيد الغفران عند اليهود و دة يوم مخصص للصلاة بس .
الطيارات المصرية اما جات تهاجم كانت تقريبا لامسة المياة ودة لان المصريين عرفوا ان عشان داردارات العدوا متلقطش الطيارات لازم تطير قريبة جدا من سطح البحر كدة , فكانت الطيارات المصرية تروح تضرب و ترجع و اسرائيل مش عارفة هى بتضرب ازاى و ازاى حائط الصورايخ مشتغلش .
و خط بارليف اللى عمله حاييم بارليف و كلفه 500 مليون دولار بفضل سلاح المهندسين فى ست ساعات مكنش له اثر
و الزوارق اللى مكنش حد ابدا يتوقع استخدامها كل دة حصل بسرعة و بتناغم خلى العدو يفقد توازنه بسرعة كبيرة جدا .
قبل ما تختم قالتلنا لو احنا بنتعب دلوقتى معاكم بس فى المستقبل هتطلعوا عظماء زى ابائكم الشهداء و هتعملوا حاجة للبلد يبقى دة بجد احسن تعب فى الدنيا .
و فى الاخر قالتلنا :
حرب اكتوبر كانت صناعة مصرية يا ترى فين الصناعة المصرية دلوقتى ؟؟

أغنية دولا مين اهداء لكل شهداء مصر اللى ضحوا بحياتهم من اجلها


و عبرنا الهزيمة للفنانة الجميلة شادية فى الذكرى الجميلة